Wednesday, October 3, 2018

அந்தமான் அழகுகள்!

               எப்பொழுதும் போல் பென்சிலை வைத்துக்கிறுக்கிக்கொண்டிருந்த பொழுது மனைவியிடமிருந்து கைப்பேசியில் அழைப்பு வர, பள்ளி சென்றுவிட்டேன் என்ற செய்தி கிடைத்தது, போனஸாக, இன்னொரு செய்தியுடன்! 'நாம் அந்தமான் செல்லலாமா? இரண்டு இடங்கள் கேன்சல் ஆகிவிட்டனவாம்! யோசித்துச்சொல்லுங்கள்! என்று அழைப்பு துண்டிக்கப்பட்டது!

              ஏற்கனவே இரண்டு மூன்று மாதங்களுக்கு முன் பேசப்பட்ட சுற்றுலா நிகழ்ச்சிதான்! மனைவியின் உடன் பணிசெய்யும் இன்னொரு ஆசிரியை திருமதி மங்கை அவர்களின் கணவர் திரு பழனியப்பன் அவர்கள் ஏற்பாடு செய்யும் நிகழ்ச்சி! எங்களால் திட்டமிடப்பட்ட எந்தவொரு நிகழ்ச்சியும் வில்லங்கத்திலேயே முடிவதால், நாங்கள் விரும்பவில்லை! செப்டம்பரில் நிகழ்ச்சி! நாங்கள் உறவினர் தவிர்த்த எந்தக்குழுவுடனும் இதுவரை சுற்றுலா வேறு சென்றதில்லை! எனவே விருப்பம் காட்டவில்லை!

                மனைவியின் குரலில் இருந்த ஆர்வம் கண்டு  மீண்டும் மனைவியை அழைத்தேன்! அதே ஆர்வத்துடன், இரண்டு பேர் வர முடியாமல் போனதால், நம்மைக்கேட்கிறார்கள்! சென்றுவரலாம் என்று நினைக்கிறேன்!' என்றதும் நானும் சரி என்று விட்டேன்!

               உடனே ஆதார் கார்ட் ஸ்கேன் செய்து அனுப்ப, சென்னையிலிருந்து அந்தமான் போர்ட்ப்லேயர் போகவர டிக்கட் ஏற்பாடு செய்யப்பட்டது! ஆனால் எல்லோரும் போகும் விமானத்தில் இடம் கிடைக்காததால், சற்று முந்தைய விமானத்தில் இருவருக்கும் இடம் கிடைத்தது!

                இது நடந்தது செப்டம்பர் 22 ம் தேதி! கிளம்ப வேண்டிய நாள் செப்டம்பர் 25ம் தேதி! அன்று அம்மாவின் திதி நெரூரில் செய்யவேண்டியிருந்தது! அன்று இரவுதான் பயணம் என்பதால் சரியென்று தயாராக ஆகிவிட்டோம்! ஆனால் யாருக்கும் சொல்லவில்லை! டிக்கட் எல்லாம் உறுதியான பிறகு சொல்லிக்கொள்ளலாம் என்று இருந்துவிட்டோம்! இரு மகன்களுக்கு மட்டும் தெரியும்! அவர்களும் பச்சைக்கொடி காட்டிவிட்டதால் விறுவிறுப்பு கூடியது!
இருந்தாலும் இருவருக்கும் சற்று கலக்கமாகவே இருந்தது!

ஆடைகள், சுட்கேசுகள் என்று கார்டு ஸ்வைப் ஆகிக்கொண்டிருந்தது! மழை இருக்கும் என்று சொல்லப்பட்டதால், ஆறு நாட்களுக்கும் ஆறு செட் துணிகள் தேவையாயிருந்தது! 23ம் தேதி மீண்டும் ஆசிரியை வீட்டிற்கு சென்று மற்ற விபரங்கள் அறிந்துகொண்டு வந்த பின்னர் தான் மறுநாள்தான் உள்ளூரில் இருக்கும் மனைவியின் அம்மாவீட்டிற்கு செய்தி சொல்லப்பட்டது! திதிக்காக கரூர் வரும் தமக்கைகளிடம் நேரில் சொல்லிக்கொள்ளலாம் என்பதால் போன் செய்யவில்லை!

                   மனைவியின் அண்ணன் மகனின் மனைவியின் தங்கை அந்தமானில் இருப்பதால் அவர்கள் வீட்டுக்கும் சென்றுவர இது ஒரு வாய்ப்பாக இருந்தது! ஆனால் அவளுக்கும் புறப்படும் அன்றுதான் தகவல் சொன்னோம்!

சுற்றுலா திட்டம்:


                      அம்மாவின் திதி முடிந்தவுடன் தமக்கைகள் நெரூரிலிருந்தே விடை பெற்றுக்கொண்டுவிட, இல்லம் திரும்பி சற்று ஓய்வெடுத்து பேக்கிங்க் வேலை ஆரம்பித்தோம். முதலுதவி மருந்துகளூம், ரெகுலர் மருந்துகளும் முன்னிடம் பெற்றன. பதினைந்து கிலோவும் ஏழு கிலோவுமே அனுமதி என்பதால் பார்த்துப்பார்த்து செய்யவேண்டியிருந்தது.( பத்து நாட்களுக்கு முன் இளைய மகன் கோவையிலிருந்து மும்பை சென்றபோது சுமார் 7500 ரூபாய் மொய் வைத்த பயத்திலேயே சற்று ஜாக்கிரதையாக இருக்க நேர்ந்தது).

                  ஒன்பது மணிக்கு பழனியப்பன் சார் வீட்டு அருகிலே வேன் நிற்கும் என்பதால், கணேசன் ஆட்டோவில் எட்டரை மணிக்கே கிளம்பிவிட்டோம்.  நாங்கள் செல்லும் பொழுது வேன் இன்னும் வந்திருக்கவில்லை! எனவே மிஸ்வீட்டிற்கு சென்று எங்கள் டிக்கட்டைப்பெற்றுக்கொண்டு சிறிது நேரம் பேசிக்கொண்டிருக்க, வேன் வரவும், பயணம் ஆரம்பித்தது. பெட்டிகள் மேலே ஏற்றப்பட, சென்னை நோக்கிப்ப்யணம் தொடங்கியது. முதல் இருக்கையில் அமர்ந்திருக்க, ஏசியின் குளிரால் சரியாகத்தூங்கமுடியாமல் நடுங்கியபடியே (ஷால் எல்லாம் மேலே பெட்டியில் மாட்டிக்கொண்டுவிட்டது) தூங்கி, தூங்காமல், சென்னை காலை சென்றடைந்தாம்.

                பல்லாவரத்தில் ஏதோ ஒரு ஹோட்டலில் ரூம்கள் போட்டு குளித்து உடை மாற்றிக்கொண்டு காலை 7.30 மணிக்கு கிளம்ப உத்தேசம். நான்கு பேருக்கு ஒரு அறையாக எடுத்துக்கொண்டு அனைவரும் தயாராகக் கிளம்பினோம். மாநிலத்தலை நகரில் அந்த ஹோட்டல் முன் இருந்த குப்பைக்கூளங்கள், அடடா, கால் வைக்க இடம் இல்லை! தூய்மை இந்தியா திட்டத்தில் அவர்களுக்கு நம்பிக்கையில்லை போலும்! இங்கும் அங்கும் கால் வைத்து பெரும்பாடு பட வேண்டியிருந்தது!

                வழியில் ஒரு ஹோட்டலில் காலை சிற்றுண்டி முடித்துக்கொண்டு ஒன்பது மணிக்கெல்லாம் விமானநிலையம் வந்தடைந்தோம். எங்கள் விமானம் 10.55 க்கு என்பதால் நானும் என் மனைவியும் முதலில் உள்ளே சென்றுவிட்டோம்.

                   ஏற்கனவே அக்கா பையன் திருமணத்திற்காக கல்கத்தா வரை விமானத்தில் சென்று வந்ததால் அவ்வளவு ஆர்வம் இல்லை! செக்இன் வேலைகள் சுலபமாக முடிய, என்ட்ரி கேட் அருகே சென்று அமர்ந்தோம்.
இருக்கையில் அமரும் போதுதான் பின் இருக்கையில் திரு கதிரி கோபால்நாத் அவர்கள் அமர்ந்த்திருப்பதைப் பார்த்தோம். அவரிடம் சூப்பர் சிங்கர் செந்திலும் ராஜலக்ஷ்மியும் பேசிக்கொண்டிருந்தார்கள்.  அவர்கள் விலக, அவர்கள் இருவருக்கும் கைகொடுத்து வாழ்த்து தெரிவித்தோம்!

              பின்னர் திரு கோபால்நாத் அவர்களிடம் சென்று வணங்கி அமர்ந்து பேசினோம்.  காலை விமானம் கேன்சல் ஆனதால், மனிதர் தனியாக அமர்ந்து செல்போனுடன் ஐக்கியமாகி இருந்தார்.  நான் அவரை வரைந்திருந்த கேரிகேச்சர் படத்தை அவருக்கு காட்டினேன்.  மிகவும் மகிழ்ந்தார். அதை அவருக்கு அனுப்பச்சொல்லி வாட்சாப் நம்பர் கொடுத்தார். நானும் மனைவியும் அவருடன் அமர்ந்து படங்கள் எடுத்துக்கொண்டோம். பின் அவரை விட்டு விலகி தனியே அமர்ந்து கொண்டோம். அந்த சில தருணங்கள்!







                அதற்குள், அந்தமானில் இருக்கும் செளம்யா
 அழைத்து தான் விமான நிலயத்தில் காத்திருப்பதாகக் கூறினாள்!  பின் 200 ரூபாய்க்கு இரண்டு காபி ( நாய் வேஷம் போட்டால் குரைக்கத்தான் வேண்டும்) சாப்பிட்டு முடிக்க, கதவு திறந்து விமானம் ஏற அழைப்பு வந்தது! உடனே முண்டியடித்துக்கொண்டு மக்கள் வரிசையில் நெருக்க, ( எல்லோருக்கும் சீட் நம்பர் கொடுக்கப்பட்டும், சினிமா டிக்கட் கவுண்டர் போல் ஏன் அவசரப்படுகிறார்கள் என்பது புதிர் தான்!) அமைதியாக வரிசையில் நின்று, குகைப்பாதையில் சென்று, விமானப்பணிப்பெண்ணின் வணக்கத்தை ஏற்று, உள் நுழைய, ஒரே புகை மண்டலம்! (தேவலோக செட்டிங் மாதிரி)! இருக்கை கண்டு பிடித்து அமர, அம்மணிக்கு ஜன்னல் சீட்டும், ஐயனுக்கு நடுசீட்டும் ( பஸ்ஸில் சென்றாலும் இதே கதை தான்! நமது உருவத்திற்கு, மூன்றாவது நபர் சற்று இளைத்திருந்தால் நமக்கு அதிர்ஷ்டம் தான்! இல்லையென்றால் சட்னி தான்) கிடைத்தது! ஜன்னலுக்கு நேரே விமானத்தின் இறக்கை இருந்ததால், வேடிக்கை பார்ப்பது சற்று சிரமமாகத்தான் இருந்தது!



வழக்கம் போல் சைகை அறிவுறுத்தலுகுப்பிறகு, (எப்பொழுதும் போல் ஒன்றும் புரியவில்லை! புரிந்தது, தனக்கு மிஞ்சி தான் தானமும் தர்மமும் என்பது போல், ஆக்ஸிஜன் மாக்ஸை முதலில் தான் ஒழுங்காக அணிந்து கொண்டு பிறகு பிறர்க்கு உதவச்சொன்னது)! விமானம் வேகம் எடுத்து...இன்னும்...இன்னும்.. விடு ஜூட்.....சட்டென்று மேலே கிளம்பியே விட்டது! (முன் ஜாக்கிரதையாக கொண்டு சென்ற பஞ்சை ஏற்கனவே காதில் வைத்துக்கொண்டாயிற்று)! சில காட்சிகள்:





விமானம் கிளம்பி சிறிது நேரத்திலேயே தள்ளு வண்டியில் சிற்றுண்டி கொடுக்க ஆரம்பித்தார்கள்! பசி இல்லையென்றாலும் சும்மா கொடுப்பதை ஏன் வேண்டம் என்று சொல்லவேண்டும் என்பதால் வாங்கிக்கொண்டோம்! ஒரு கேக், ஒரு பன், ஒரு சிறிய பட்டர் பாக்கட், புலாவ் மாதிரி ஏதோ ஒன்று, தொட்டுக்கொள்ள கிரேவியுடன்! ஒரு கத்தி, ஒரு ஸ்பூன் மற்றும் டிஸ்யு பேப்பர்! சாப்பிட்டு முடிக்க, காபி வந்தது! டிகாக்ஷன் தனியாக டம்ளரில், பால் பவுடரும் சர்க்கரையும் தனி! காபி குடித்து வாயைக்கெடுத்துக்கொண்ட நேரத்தில் விமானம் பாதி தூரத்திற்கு மேல் கடந்திருந்தது! சரி கிண்டிலில் படிப்போம் என்று அதை ஆன் செய்ய இரண்டு பக்கத்திற்கு மேல் படிக்க விடாமல் கண்ணைச்சுழற்றியது தூக்கம்! சற்றே கண் அயர்வதற்குள் டொய்ங்க் என மணி அடித்து விமானம் தரை இறங்கப்போவதாக அறிவித்தார்கள்! உடனே காமிராவைத்தயாராக வைத்துக்கொண்டு தரை இறங்கும் சமயத்தில் எடுத்த சில காட்சிகள்!









விமானத்திலிருந்து இறங்கி பஸ்ஸிற்காக நிற்கும் போது கிளிக்கியது!





         விமான நிலையத்தில் புகைப்படம் எடுத்தால் 5000 ருபாய் அபராதம் என்ற பலகையைப்பார்த்ததும் சத்தமில்லாமல் மொபைல் போனை பைக்குள் வைத்து விட்டு பேருந்தை நோக்கி நடையைக் கட்டினோம்!

              மிகச்சிறிய விமான நிலையம்! செக் இன் பெட்டிகள் வருவதற்கும் செளம்யாவிடமிருந்து போன் வருவதற்கும் சரியாக இருந்தது! வெளியே கடுமையான வெய்யில்! இதில் குழந்தை அப்ரமேயனையும் தூக்கிக்கொண்டு வந்திருந்தாள்! நாங்கள் சாப்பிட சமைத்தும் எடுத்து வந்திருந்தாள்! குழந்தைக்கு உடல்நிலை சரியாக இல்லாததால் ஒரு அரைமணி நேரம் இருந்துவிட்டு கிளம்பிவிட்டாள்.  அதற்குள் எங்களை அழைத்துச்செல்ல வந்த நபரை அடையாளம் கண்டு கொண்டுவிட்டோம். அடுத்த விமானத்தில் வரும் குழுவின் மற்ற நபர்களுக்காக காத்திருக்க ஆரம்பித்தோம்! செளம்யாவுடனான சந்திப்பில் சில காட்சிகள்!







                      மற்ற நண்பர்கள் வந்ததும் தொடர்வோம்.............

Wednesday, March 16, 2016

Sridhar Comravalli , connected to Karur through his mothers side, is a great cartoonist and is also a retired Banker. Through Sudha Venkatesh, I got his friendship. This work is a small return gesture for his cari of me. Thank you sir and hope you like this.

Tuesday, March 15, 2016

Jeeva sir drew me in no minutes in the last week's workshop at covai! Also he did not hesitate to pose to my attempt which was my first ever live drawing! It was a great moment for me that I was completely out of my nerves and drew some lines in vain to bring Jeeva sir on the board! But the encouragement was overwhelming and the support from the audience that I could never forget! Thanks to Rajamaran Kandamaran ,K r K.r. Ramakrishnan, Siva Kirubanandan, Devanathan Srinivasan and the most to Jeeva Nanthan! Thanks to all the audience!



Saturday, March 12, 2016



என்ன போராட்டம்?
விவசாயிகள் தங்களையும் தடியடி பண்ணச்சொல்லி போராட்றாங்க!
எதுக்காம்?
அப்பத்தான் யாராவது தங்களோட கடனையும் அடைப்பாங்களாம்!



Sunday, November 25, 2012

துளசி பூஜை!

இன்று துளசி பூஜை!  மீண்டும் வேலூர் ஞாபகம்!

 என் மனைவி மட்டுமே செய்த பூஜையைப் பார்த்தபோது வேலூரில் வெகு விமரிசையாக இந்த விழா நடந்ததை நினைக்காமல் இருக்க முடியவில்லை, அக்ரஹாரத்தில் சென்னமத்தை (நண்பன் நரசிம்மனின் வீடு) வீட்டின் பின்புறம் இருந்த மிகப்பெரிய துளசி மாடத்திற்கு செய்யப்பட்ட விமரிசையான பூஜை!

எல்லா வீட்டுப் பெண்களும் தங்கள் வீடுகளிலிருந்து கொண்டு வந்த ரவை உருண்டை, நெற்பொரி உருண்டை, கொசம்பரி(பாசிப்பருப்பை நீரில் ஊற வைத்து, அதில் மாங்காய், வெள்ளரிக்காய் முதலியவற்றுடன் பச்சை மிளகாய் தாளித்துக் கொட்டப்பட்டு, எலுமிச்சம்பழமும் பிழியப்படும்) ஆகியவை நிவேதனம் செய்யப்படும்.

தீபாவளியன்றே, இன்றய தினத்திற்காக பட்டாசுகள் தனியே எடுத்து வைக்கப்பட்டிருக்கும். துளசி மாடத்தைச்சுற்றி நாங்கள் பட்டாசுகளை கொளுத்தி விட்டு இந்த உருண்டைகளுக்காக காத்திருக்கும் அவதியே சுகமானது,,,,

இன்று வேலூரில் நாங்கள் யாரும் இல்லை. சென்னமத்தையின் வீடும் இல்லை,(கோகிலா திருமண மண்டபமாக இப்போது மாறிவிட்டது)!

இப்பொழுது எங்கள் வீட்டிற்கும் வர ஆளில்லை. பட்டாசு விட சிறுவர்கள் இல்லை, இந்தப்பயணம் இன்னும் எத்தனை நாட்கள் தொடரும் என்பது கேள்விக்குறி தான்!

Friday, January 20, 2012

பயணம் தொடர்கிறது....



        திருப்பாலைத்துறையிலிருந்து  கிளம்பும்போதே மணி ஆறை நெருங்கிக்கொண்டிருந்தது. சூரியன் மேற்கில் மறைந்து கொண்டிருந்தான். அடுத்து செல்ல வேண்டிய இடம் திருநல்லூர் எனப்படுகின்ற நல்லூர். பாபனாசத்திலிருந்து கும்பகோணம் செல்லுமுன் சிறிய சாலை ஒன்று பிரிந்து ரயில்வே கேட் வழியாக சென்றது. ஊர் மக்களிடம் வழி பற்றி உறுதி செய்துகொண்டு காரில் பயணம் தொடர்ந்ததது. அந்தி மாலையில் வயல் வெளிகளுக்கு நடுவே சென்றபோது பொன்னியின் செல்வனில் வந்தியத்தேவன் குதிரையில் பயணம் செய்தது நினைவில் வந்தததை தடுக்கமுடியவில்லை. பாதையின் இருமருங்கிலும் பச்சைப்பசேல் என்று நெல் வயல்கள். நல்லுருக்குத்திரும்பும் பாதையில் ஒரு அருமையான அல்லிக்குளம்.





பாட்டீச்வரம் செல்லும் சாலை பிரியும் இடத்தில் இந்த குளம் அமைந்துள்ளது. சாலையில் வலது புறம் திரும்பி நல்லூர் நோக்கிச் சென்றோம்.

நல்லுரின் சிறப்பு:

       கோயிலின் மூலவரான லிங்கம் பகலில் ஐந்து முறை நிறம் மாறும் அதிசியம் இங்கு நிலவுகிறது.



மணி ஆறை நெருங்கிகொண்டிருந்ததால் அவசர அவசரமாக சன்னதியை அடைந்தோம். படிகளில் ஏறி செல்லவேண்டி இருந்தது. கோயிலில் எங்களைத்தவிர இன்னும் சிலர் இருந்தனர். நாங்கள் பார்க்கும் பொழுது லிங்கம் தாமிர கவசம் அணிந்தது போல் தோற்றம் அளித்தது. அது கவசம் இல்லை, லிங்கமே அவ்வாறு உள்ளது என்று கோயில் குருக்கள் சொன்னார். மின்சாரம் வேறு இல்லாததால் மிக இருட்டாக இருந்தது.
 
                 மூலவர் பெயர் கல்யாண சுந்தரேஸ்வரர். அம்மன் பெயர் கிரி சுந்தரி.  மாசி மகம் இத்தளத்தில் மிகவும் விசேஷம் என்று சொன்னார்கள். கோயில் முன் இருக்கும் திருக்குளத்தில் ஏழு கடல்கள் சங்கமிப்பதாக ஐதீகம் என்றும் சொன்னார்கள். கோயிலின் சில காட்சிகள்:








கோயிலின் மரத்தாலான கதவுகளில் நல்ல வேலைப்பாடுகள். இருட்டில் சரியாகத் தெரியவில்லை. சில காட்சிகள்;





அடுத்து பட்டீஸ்வரத்தில் சந்திப்போம்.......

Monday, January 9, 2012

காரில் ஒரு பயணம்………….

       இந்த முறை அரையாண்டு விடுமுறையில் எஙுகு செல்வது என்று யோசித்தபோது கும்பகோணம் கோயில்களைப் பார்த்துவரலாம் என்று முடிவெடுத்தோம். கரூர் வீட்டிலிருந்து அக்கா, ரவி மற்றும் லதாவும் கூட வர முடிவானதும் என்னுடைய மாருதி காரிலேயே சென்று வரலாம் என்றும் முடிவெடுத்தோம்.

       சனிப்பெயர்ச்சி நாளன்று வெண்ணைமலை முருகன் கோயிலுக்கு சென்ற போது அங்கே சரவண குருக்களை சந்திக்க நேர்ந்தது. எங்களுடைய பயணம் பற்றி அவரிடம் பேசியபோது தன்னுடைய உறவினர் பாபநாசம் கோயிலில் இருப்பதாகவும், பயணத்திற்கு வேண்டிய உதவிகள் கிடைக்கும் என்றும் சொன்னார். ஆகா! பயணத்திற்கு முருகனின் அருள் கிடைத்துவிட்டது என்று மகிழ்ச்சி ஏற்பட்டது.

       கும்பகோணம் பக்கம் நானும் அதிகம் சென்றதில்லை. ஒரு முறை எங்கள் சங்கக் கூட்டம் அங்கே பத்து பதினைந்து வருடங்களுக்கு முன் நடைபெற்ற போது சென்றது தான். வைத்தீஸ்வரன் கோயிலுக்கு
1987 ல் அண்ணாமலை பல்கலைக்கழகத்தில் ஒரு கம்ப்யூட்டர் கோர்ஸ் செய்யாதபோது சென்றது தான்.

           கரூர் கடைகளில் கும்பகோணம் பற்றிய புத்தகங்கள் கிடைக்காததால், இன்டர்நெட்டில் தேடியபோது கிடைத்த விவரங்கள் ஏராளம். ஒவ்வொரு இடத்தைப்பற்றியும் அது கும்பகோணத்தில் இருந்து எவ்வளவு தொலைவில் உள்ளது என்றும் அறிய செய்திகள் கிடைத்தன. அவற்றை printout ம் எடுத்துக்கொண்டேன்.

          அனுமன் ஜெயந்தி நாளான டிசம்பர் 24  ம் தேதி காலையில் வெண்ணைமலை ஆஞ்சநேயரைத் தரிசனம் செய்துகொண்டு பூமாவின் வீட்டுக்கு சென்றோம். காலை உணவு முடித்துக்கொண்டு சுமார் பதினோரு மணி அளவில் கரூரை விட்டுப் புறப்பட்டோம்.

        கரூர் திருச்சி சாலை சற்று சுமாராக இருந்தது. குளித்தலை தாண்டி பெட்டவாத்தலை வரை மிக மோசமான சாலை. சத்திரம் பேருந்து நிலையத்திலிருந்து திருவானைக்காவல் நோக்கி சென்று பின் சென்னை சாலையில் சென்று தஞ்சாவூர் bypass அடைந்தேன். ரவி வழி சொல்ல நேராக திருவெறும்பூர் சாலையைக் கடந்தது PNB  Circle ஆபீஸ் ஐத்
தாண்டியதும் நான்கு வழிச்சாலை வரவேற்றது.

     நெடிய பயணம். மணி பகல் 1 .30 ஐ நெருங்கி க்கொண்டு இருந்தது. தேநீர் அருந்தவழி இல்லை. சுங்கச்சாவடி தாண்டியதும் மாருதி வேகம் பிடித்தது. சிறிது தூரம் சென்றதுமே ஒரு மோடல்(Motel) கண்ணில் பட்டது வயிற்றில் தேனீர் வார்த்தது போல் இருந்தது.


நல்ல பார்கிங் வசதியுடன் இருந்தது. சிறிது ஒய்வு எடுத்துக்கொண்டு, தேநீர் அருந்திவிட்டு மீண்டும் பயணம் தொடர்ந்தது .



கும்பகோணம் வரை இந்த சாலை இருந்தால் நன்றாக இருக்கும் என்று மனம் எண்ணியது. பெரியார் மணியம்மை பல்கலைக்கழகம், சாஸ்த்ரா பல்கலைக்கழகம் இரண்டையும் வேகமாக கடந்து சென்றது வண்டி.. தஞ்சாவூர் செல்லாமலேயே சென்ற வண்டி திடீரென்று பாதையை விட்டு விலக நேர்ந்தது. கும்பகோணம் செல்ல கைகாட்டி கீழிறங்க கட்டளையிட, மீண்டும் குறுகலான சாலைப்பயணம். நேரம் மதியம் மணி மூன்றை நெருங்கிக்கொண்டிருந்தது. கரடு முரடான பாதை கரூர் திருச்சிப்பாதைக்கு நல்ல பெயரைப்பெற்றுத்தந்தது.



குறுகிய வளைவுகள், மேடுகளாலும் பள்ளங்களாலும் போடப்பட்ட சாலைக்கு மாலையிட்டு மரியாதை செய்தன. மாருதி சலைக்காமல் சென்று கொண்டிருந்தது. பாபநாசத்தைக் கடந்து கொண்டிருந்தது. திடீரென்று அக்கா 108 சிவஸ்தலம் போர்டைப்பார்த்த

தாகச்சொன்னார். முன்னே சென்றுவிட்ட வண்டியை நிறுத்தி Reverse எடுத்து கோயிலை அடைந்து வண்டியை குளக்கரையை ஒட்டி நிறுத்தினேன். மணி மாலை 3.45. கோயில் 4 மணிக்குத் திறப்பார்கள் என்று சொன்னார்கள். ஏற்கனெவே அங்கு பத்து பதினைந்துபேர் காத்திருந்தார்கள்.



மரங்களுக்கு இடையில் கோயில்.

சரியாக நான்கு மணிக்கு நடை திறக்கப்பட்டது. 108 சிவலிங்கங்களைக் காண சிறப்பு அனுமதி சீட்டு வாங்கி சென்றோம். ஒரே ஹாலில் 108 சிவலிங்கங்கள் ப்ரதிஷ்டை செய்யப்பட்டு இருந்தன.




மூன்று வரிசைகளில் சிவலிங்கங்கள் அமைக்கப்பட்டுள்ளன. ஒவ்வொரு லிங்கத்திற்கும் மேலே ஒரு விளக்கு தொங்கிக்கொண்டிருந்தது.. இதற்கு விளக்கேற்ற தனி சீட்டு வாங்க வேண்டும். இவற்றைப்பார்த்துவிட்டு சுவாமி சன்னதிக்குச் சென்றோம். கூட்டமில்லாததால் நல்ல தரிசனம். ப்ரசாதம் வாங்கிக்கொண்டு கிளம்பும் போது, குருக்களிடம் விசாரித்த போது, தான் தான் வெண்ணய்மலை குருக்களின் உறவினர் என்று சொன்னார்.

நாங்கள் வெண்ணைமலையிலிருந்து வருவதாகச் சொன்னதும், எங்களை உள்ளே அழைத்துச் சென்று மீண்டும் தரிசனம் செய்வித்து ப்ரசாதம் வழங்கினார். எங்கள் பயணம் பற்றி கூறியதும், அங்கிருந்தவரிடம் சொல்லி, நாங்கள் பார்க்க வேண்டிய இடங்கள் பற்றியும், செல்லும் வழி பற்றியும் விளக்கமாக எழுதிக்கொடுத்தார்.

அவர் கொடுத்த பயணக் குறிப்பு.

24/12/2011 பார்க்கவேண்டியவை:

1. திருப்பாலைதுறை

2. திருநல்லூர்.(நல்லூர்)

3. பட்டீஸ்வரம்/திருசக்திமுற்றம்.

4. சுவாமி மலை

5. திருவலஞ்சுழி

6. தாராசுரம்.

7. கும்பேஸ்வரர்/சாரங்கபாணி/ராமசுவாமி கோயில்கள்.

25/12/2011 பார்க்கவேண்டியவை:

1. ஆலங்குடி(குரு ஸ்தலம்)

2. திருநாகேஸ்வரம்(ராகு ஸ்தலம்)

3. ஒப்பிலியப்பன் கோயில்

4. அய்யாவாடி (ப்ரத்யங்கரா தேவி)

5. நாச்சியார் கோயில் (கல் கருடன்)

6. திருப்பாம்புறம்- ராகு கேது ஸ்தலம்

7. திருமிச்சூர், - லலிதாம்பிகை

8. திலதர்ப்பணபுரி ஆதி விநாயகர் கோயில்.

9. கூத்தனூர் (சரஸ்வதி கோயில்)

10. திருநள்ளார் (சனீஸ்வரன் கோயில்)

11. திருக்கடையூர்.(அபிராமி)

26/12/2011 அன்று பார்க்கவேண்டியவை.

1. கீழ்ப்பெரும்பள்ளம்.(கேது)

2. திருவெண்காடு (புதன்)

3. வைத்தீஸ்வரன் கோயில் (செவ்வாய்)

4. கஞ்சனூர்(வெள்ளி)

5. சூரியனார் கோயில்

6. திங்களூர்.

குருக்களுக்கு நன்றி சொல்லிவிட்டு புறப்பட்டோம். அட்டவணைப்படி, முதலில் பார்க்கவேண்டியது திருப்பாலைத்துறை. அதுவும் பாபநாசத்திலேயே இருந்தது. கோயிலானது ஒரு சாலை வளைவில், இடது புறம் இருந்ததால் பார்வைக்குத் தப்பி விட்டது. சுமார் 2 கி மீ முன்னே சென்று விட்டு பின் விசாரித்துக் கொண்டு வந்த வழியிலேயே திரும்பிச் சென்று கோயிலை அடைந்தோம். மாலை 5.30 மணி.

சூரியன் அஸ்தமிக்கும் நேரம்.





சூரிய ஒளியின் பிண்ணனியில் ஒரு காட்சி:





கோயிலின் முன்புறத்  தோற்றம்:





ஒரு silhout காட்சி:





கோயிலில் நுழையுமுன், வலதுபுறத்தில் செங்கல்லினால் கட்டப்பட்ட ஒரு நெற்களஞ்சியம். நாயக்கர் காலத்தில் கட்டப்பட்டது. தொல்பொருள் துறையினரால் பராமரிக்கப்பட்டு வருகின்றது.







இங்கு சுவாமி தரிசனம் செய்து கொண்டு புறப்பட்டோம்.

பயணம் தொடரும்.......

  10 அக்டோபர் 2026: கோவையில் டாடாபேடில் ஹரியின் வீட்டில் தங்கியிருக்கும் போது, ஸ்ரீ ஹரி வாயு ஸ்துதியினைத் தமிழ்க் கவிதை வடிவில் எழுதலாம் என்...