Tuesday, December 24, 2019



திருப்பாவைச்சித்திரங்கள்

திருப்பாவை 06

புள்ளும் சிலம்பின காண் புள்ளரையன் கோயிலில்
வெள்ளை விளிசங்கின் பேரரவம் கேட்டிலையோ?
பிள்ளாய் எழுந்திராய்! பேய்முலை நஞ்சுண்டு
கள்ளச் சகடம் கலக்கழியக் காலோச்சி
வெள்ளத்து அரவில் துயிலமர்ந்த வித்தினை
உள்ளத்துக் கொண்டு முனிவர்களும் யோகிகளும்
மெள்ள எழுந்து அரியென்ற பேரரவம்
உள்ளம் புகுந்து குளிர்ந்தேலோர் எம்பாவாய்



திருப்பாவைச்சித்திரங்கள்

திருப்பாவை 05


மாயனை மன்னு வடமதுரை மைந்தனை
தூய பெருநீர் யமுனைத் துறைவனை
ஆயர் குலத்தினில் தோன்றும் அணிவிளக்கை
தாயைக் குடல்விளக்கம் செய்த தாமோதரனை
தூயோமாய் வந்து நாம் தூமலர்த் தூவித்தொழுது
வாயினால் பாடி மனத்தினால் சிந்திக்க
போய பிழையும் புகுதருவான் நின்றனவும்
தீயினில் தூசாகும் செப்பேலோர் எம்பாவாய்




திருப்பாவைச்சித்திரங்கள்

திருப்பாவை 04



ஆழி மழைக்கண்ணா! ஒன்று நீ கைகரவேல்
ஆழியுள் புக்கு முகந்துகொடு ஆர்த்தேறி
ஊழி முதல்வன் உருவம்போல் மெய்கறுத்து
பாழியந் தோளுடைப் பற்பநா பன்கையில்
ஆழிபோல் மின்னி வலம்புரிபோல் நின்றதிர்ந்து
தாழாதே சார்ங்கம் உதைத்த சரமழைபோல்
வாழ உலகினில் பெய்திடாய் நாங்களும்
மார்கழி நீராட மகிழ்ந்தேலோர் எம்பாவாய்.



திருப்பாவைச்சித்திரங்கள்

திருப்பாவை 03

ஓங்கி உலகளந்த உத்தமன் பேர்பாடி
நாங்கள் நம் பாவைக்குச் சாற்றி நீராடினால்
தீங்கின்றி நாடெல்லாம் திங்கள் மும்மாரி பெய்து
ஓங்கு பெருஞ்செந்நெல் ஊடு கயலுகள
பூங்குவளைப் போதில் பொறிவண்டு கண்படுப்ப
தேங்காதே புக்கிருந்து சீர்த்த முலை பற்றி
வாங்கக் குடம் நிறைக்கும் வள்ளல் பெரும்பசுக்கள்
நீங்காத செல்வம் நிறைந்தேலோர் எம்பாவாய்.


திருப்பாவைச்சித்திரங்கள்!

திருப்பாவை 02




வையத்து வாழ்வீர்காள்! நாமும் நம் பாவைக்குச்
செய்யும் கிரிசைகள் கேளீரோ பாற்கடலுள்
பையத்துயின்ற பரமன் அடிபாடி
நெய்யுண்ணோம் பாலுண்ணோம் நாட்காலே நீராடி
மையிட்டு எழுதோம் மலரிட்டு நாம் முடியோம்
செய்யாதன செய்யோம் தீக்குறளை சென்றோதோம்
ஐயமும் பிச்சையும் ஆந்தனையும் கைகாட்டி
உய்யுமா றெண்ணி உகந்தேலோர் எம்பாவாய்.


திருப்பாவைச்சித்திரங்கள்!


திருப்பாவை 01

மார்கழித் திங்கள் மதிநிறைந்த நன்னாளால்
நீராடப் போதுவீர் போதுமினோ நேரிழையீர்
சீர்மல்கும் ஆய்ப்பாடிச் செல்வச் சிறுமீர்காள்
கூர்வேல் கொடுந்தொழிலன் நந்தகோ பன்குமரன்
ஏரார்ந்த கண்ணி யசோதை இளம்சிங்கம்
கார்மேனி செங்கண் கதிர்மதியம் போல்முகத்தான்
நாரா யணனே நமக்கே பறை தருவான்
பாரோர் புகழப் படிந்தேலோர் எம்பாவாய்.







Thursday, August 8, 2019

ஆடிக் காற்று!
வழக்கத்தை விட இந்த மாதம் ஆடிக்காற்று இங்கு பிய்த்து உதறுகிறது! பக்கத்து பிள்ளையார் கோயில் அரச மரமும் அதனுடன் பின்னிய வேம்பும் இந்தக் காற்றில் சலசலத்துத்தான் விட்டன! வகுப்பில் டீச்சர் சைலன்ஸ் என்றதும் அடங்கி மீண்டும் எழும் சலசலப்பாய் விட்டு விட்டு ரீங்காரமாய், இல்லை இல்லை, ஹூங்காரமாய் சத்தமிட்டு அவை பேயாட்டம் ஆடுகின்றன! எல்லா இலைகளும் ஆடி ஆடி, ஒருவித களைப்புடனேயே இருக்கின்றன! சரியாகச் சொல்ல வேண்டுமென்றால் சமுத்திரத்தின் அலைகளாய் இந்த ஆடிக்காற்று அடித்துக்கொண்டே இருக்கிறது! உரைக்காத வெயிலும், அவ்வப்பொழுது விழும் சாரலும் ஆடிக்காற்றின் இலவச இணைப்புகள்! இந்த ஆடிக்காற்றை இதை விட அனுபவித்த சுகமும் உண்டு! நாற்பது ஐம்பது வருடங்களுக்கு முன் , எங்கள் ஊரின் (பரமத்தி வேலூர்) காவிரி, ஆடியில் தரும் இன்பமே அலாதி தான்! காவிரி்ப் பாலத்தின் இருபுறமும் சரிந்து இறங்கும் கருங்கல் படிக்கட்டுக்களில் இறங்கும்போதே , இதோ உன்னைத் தூக்கிச்சென்று விடுவேன் என அடிக்கும் காற்று! மீறி இறங்கி, அந்த உடைந்த பிள்ளையார் கோயிலின் சிதறிக்கிடக்கும் துண்டங்களில் அமர்ந்துவிட வேண்டும்! தன்னைத் தடுக்கும் பாலத்தின் மீது பெருங்கோபமாய் அந்தக் காற்றின் சப்தம் அந்தப்பிரதேசத்தையே அதிர வைக்கும்! இறுக்கிப்பிடித்து அமர்ந்திருக்கையில், படி தொட்டு ஓடும் ஆற்றின் நீர் காற்றால் அலைக்கழிக்கப்பட்டு, உடைந்து கிடக்கும் படித்துறையில் மோதி மேலே பன்னீராய்த் தூவ, நனைந்த உடையும் மனமும் குளிருக்கு உத்திரவாதம்! விட்டுச்செல்ல மனமின்றி, இருள் வருமுன் வீட்டிற்குத்திரும்புவோம்! காவிரியின் வறட்சியும் சாலைகளின் விரிவாக்கமும் அந்த சூழலையே மாற்றிவிட்டன! இன்று அந்த இளமையும் தொலைந்து, காவிரியும் தொலைந்து , வேற்றூரில் பக்கத்து கோயில் அரச மரமும், காற்றும் , சலசலப்பும் மட்டுமே மிச்சம்! எங்கோ பெய்யும் கனமழையின் அறிவிப்பை மட்டுமே செய்கிறது இன்று இங்கே இந்த ஆடிக்காற்று! யாரோ பாடியது போல, வெறுங் காத்துதான் வருது, சத்தத்துடன்!

  10 அக்டோபர் 2026: கோவையில் டாடாபேடில் ஹரியின் வீட்டில் தங்கியிருக்கும் போது, ஸ்ரீ ஹரி வாயு ஸ்துதியினைத் தமிழ்க் கவிதை வடிவில் எழுதலாம் என்...